Some women knocking glass even and straight with men

Nov 15, 2026 Dem Boys Seh, Features / Columnists, News

(Kaieteur News) – Dem boys wan bet dat on a per capita basis, Guyana gat to be among de countries with de highest consumption of alcohol in de world. And dat include high wine, bush rum, XM, El Dorado and every other concoction. In fact, some people love dem drinks so much dat if alcohol was a subject at CXC, dem woulda get Grade One without attending a single class.

Long ago, it use to be mostly men who use to be de main drinkers. But dem days gone! Today, some women knocking glass even and straight with men. Dem throwing down tequila like if is water. Dem guzzling down beer like if is soft drink. Some of dem can put away a bottle of rum and still remember everybody birthday, everybody business and everything yuh tell dem five years ago.